पिंपरी-चिंचवडमध्ये केमिस्टांच्या देशव्यापी बंदला १००% प्रतिसाद; ऑनलाइन औषध विक्रीला तीव्र विरोध

पिंपरी-चिंचवड, दि. २० मे २०२६: अखिल भारतीय केमिस्ट अँड ड्रगिस्ट असोसिएशन (AIOCD) यांनी पुकारलेल्या देशव्यापी बंदला पिंपरी-चिंचवड शहरातून उत्स्फूर्त आणि शंभर टक्के प्रतिसाद मिळाल्याचा दावा करण्यात आला आहे. शहरातील सर्व होलसेल तसेच रिटेल औषध विक्रेत्यांनी या आंदोलनात सहभाग घेत औषध दुकाने बंद ठेवून संघटनेच्या मागण्यांना पाठिंबा दर्शविला.

मिळालेल्या माहितीनुसार, हा बंद पूर्णपणे शांततेत, शिस्तबद्ध आणि लोकशाही मार्गाने पार पडला. कोणताही अनुचित प्रकार घडला नसून औषध व्यवसायाशी संबंधित गंभीर प्रश्नांकडे शासनाचे लक्ष वेधण्यासाठी हे आंदोलन करण्यात आले.

या आंदोलनादरम्यान केमिस्ट संघटनांनी अनेक महत्त्वाच्या मागण्या मांडल्या. बेकायदेशीर आणि अनियंत्रित ऑनलाइन औषध विक्री तात्काळ बंद करण्याची मागणी करण्यात आली. औषध विक्रीमध्ये प्रशिक्षित फार्मासिस्टची भूमिका अत्यंत महत्त्वाची असल्याने ऑनलाइन औषध विक्रीमुळे रुग्णांच्या सुरक्षिततेला धोका निर्माण होत असल्याची भूमिका संघटनांनी मांडली.

तसेच, ई-फार्मसी आणि ऑनलाइन कंपन्यांकडून डॉक्टरांच्या प्रिस्क्रिप्शनशिवाय नियमबाह्य पद्धतीने औषध विक्री होत असल्याचा आरोप करत त्यावर कठोर कारवाई करण्याची मागणी करण्यात आली. यासोबतच ड्रग्ज अँड कॉस्मेटिक्स अ‍ॅक्टचे काटेकोर पालन करून नियमांचे उल्लंघन करणाऱ्यांवर तातडीने कारवाई करण्याचीही मागणी करण्यात आली.
लघु आणि मध्यम केमिस्ट व्यवसायांचे संरक्षण करण्यासाठी अन्यायकारक धोरणे मागे घ्यावीत, तसेच रुग्णांना योग्य मार्गदर्शन, सुरक्षित औषध वितरण आणि प्रशिक्षित फार्मासिस्टची सेवा मिळावी यासाठी पारंपरिक औषध विक्री व्यवस्था अधिक सक्षम करण्याची आवश्यकता संघटनांनी व्यक्त केली.

दरम्यान, पिंपरी-चिंचवड महापालिकेचे महापौर आणि फार्मासिस्ट रविभाऊ लांडगे यांनीदेखील ऑनलाइन औषध विक्रीस ठाम विरोध दर्शवत या आंदोलनाला समर्थन दिले. AIOCD च्या देशव्यापी बंदला पाठिंबा देत त्यांनी फार्मासिस्ट आणि औषध विक्रेत्यांच्या न्याय्य मागण्यांना पाठिंबा असल्याचे स्पष्ट केले.

ऑनलाइन औषध विक्रीमुळे रुग्णांच्या सुरक्षिततेचा प्रश्न निर्माण होत असून स्थानिक फार्मासिस्ट आणि जनऔषध सेवा धोक्यात येत असल्याचे मत यावेळी व्यक्त करण्यात आले. “औषध हे केवळ उत्पादन नसून तज्ज्ञ फार्मासिस्टच्या मार्गदर्शनाखाली दिली जाणारी आरोग्य सेवा आहे,” अशी भूमिका आंदोलनकर्त्यांनी मांडली.

या बंदला मिळालेल्या अभूतपूर्व प्रतिसादाबद्दल सर्व होलसेलर, रिटेलर आणि औषध विक्रेता बांधवांचे आभार व्यक्त करण्यात आले. पिंपरी-चिंचवडमधील केमिस्ट बांधवांनी एकजुटीने सहभाग नोंदवत संघटनेची ताकद दाखवून दिल्याचे सांगण्यात आले.

– विवेक मल्हारी तापकीर
अध्यक्ष – काळेवाडी रहाटणी केमिस्ट असोसिएशन
उपाध्यक्ष – केमिस्ट असोसिएशन ऑफ पुणे डिस्ट्रिक्ट