वाकड परिसरातील रस्त्यांची दुरवस्था बनली नागरिकांसाठी रोजचा संघर्ष
पिंपरी चिंचवड | २ जुलै २०२५
हिंजवडी आयटी पार्ककडे जाणाऱ्या प्रमुख प्रवेशद्वारांपैकी एक असलेल्या वाकड परिसरातील रस्त्यांची दुरवस्था दिवसेंदिवस गंभीर होत चालली आहे. भुजबळ चौक, भूमकर चौक, ताथवडे, पुनावळे तसेच राष्ट्रीय महामार्गालगत असलेल्या सेवा रस्त्यांवर मोठ्या खड्ड्यांनी नागरिकांच्या संयमाचा अंत पाहायला सुरुवात केली आहे.
हे हि वाचावे
“१ जुलैपासून ट्रक, टेम्पो, बस बंद! ई-चलनामुळे संतप्त वाहतूकदार रस्त्यावर”
दररोज हजारो आयटी कर्मचारी, विद्यार्थी, महिला व स्थानिक नागरिक या मार्गांचा वापर करत असताना वाहतूक कोंडी, खड्डे आणि धोकादायक वळणांमुळे अपघातांचे प्रमाण वाढले आहे. वाकड परिसरातील रस्त्यांची दुरवस्था ही केवळ वाहतुकीची समस्या नसून ती मानसिक आणि आर्थिक नुकसानीचे कारण बनत आहे.
नागरिकांचा उद्रेक; प्रशासनाकडून तातडीच्या कारवाईची मागणी
राष्ट्रवादी युवक काँग्रेसचे प्रदेश उपाध्यक्ष विशाल वाकडकर यांनी या प्रश्नावर ठाम भूमिका घेत महापालिका व NHAI ला पत्रव्यवहाराद्वारे मागणी केली आहे की, संबंधित विभागांनी युद्धपातळीवर रस्त्यांची दुरुस्ती आणि वाहतूक नियोजनावर काम करावे. त्यांनी सांगितले की, “हिंजवडी हे देशातील एक अग्रगण्य आयटी हब असून वाकड हे त्याचे प्रवेशद्वार आहे. मात्र वाकड परिसरातील रस्त्यांची दुरवस्था पाहता कोणत्याही आधुनिक शहरास लाजवणारी आहे.”
रस्तेच नव्हे, वाहतूक नियोजन व सिग्नल सुधारणेही गरजेचे
वाकडकर यांच्या म्हणण्यानुसार, सकाळी व सायंकाळी होणारी प्रचंड वाहतूक कोंडी, अपूर्ण सिग्नल व्यवस्था, अंडरपासमधील जलनिकासीचा अभाव यामुळे नागरिकांचे आरोग्य आणि वेळ दोन्ही धोक्यात आले आहे. त्यांनी प्रशासनास सूचित केले की, केवळ रस्त्यांची डागडुजी नव्हे तर दीर्घकालीन उपाययोजनांवर भर द्यावा.
ठोस कृती आराखड्याची गरज
स्थानिक सोसायट्या, वाहतूक पोलीस, महापालिका अधिकारी आणि NHAI यांनी संयुक्त बैठक घेऊन कार्यपद्धती ठरवावी, अशी अपेक्षा विशाल वाकडकर यांनी व्यक्त केली आहे. वाकड परिसरातील रस्त्यांची दुरवस्था ही तातडीची समस्या असून, ती लवकरात लवकर सोडवणे हाच प्रशासनाचा प्राधान्यक्रम असायला हवा.
