पिंपरी (प्रतिनिधी), दि. ७ डिसेंबर २०२५ :
सेवा विकास सहकारी बँक लिमिटेड, पिंपरीच्या सभासदांचा प्रथम भव्य मेळावा संत तुकाराम हॉलमध्ये मोठ्या उत्साहात पार पडला. शेकडो सभासद, कर्मचारी, ठेवीदार आणि ग्राहकांच्या उपस्थितीत सेवा विकास बँक बचाव कृती समिती स्थापन करण्यात आली. कामगारनेते यशवंतभाऊ भोसले यांच्या मार्गदर्शनाखाली झालेल्या या मेळाव्यात बँक पुन्हा सुरू करण्याची एकमुखी मागणी नोंदवण्यात आली.
मेळाव्यात माजी संचालक संपतराव ओव्हाळ यांची कृती समितीच्या अध्यक्षपदी निवड करण्यात आली. कामगारनेते यशवंतभाऊ भोसले, माजी संचालक अशोक दखनेजा, व्ही. टी. जोगदंड, सुशील बजाज, नंदू आप्पा कदम आदी मान्यवरांनी मार्गदर्शन केले.
लिक्विडेटरच्या कारभारावर सभासदांचा प्रश्नचिन्ह
कामगारनेते यशवंतभाऊ भोसले यांनी मेळाव्यात सांगितले की, सप्टेंबर २०२५ मध्ये बँकेतील बहुसंख्य कर्मचारी राष्ट्रीय श्रमिक आघाडीत समाविष्ट झाले. त्या वेळी लिक्विडेटरकडून झालेल्या अन्यायाची माहिती संघटनेसमोर आली.
संघटनेने अप्पर कामगार आयुक्त यांना पत्रव्यवहार करून बँक विभाग बंद करताना व २०५ कर्मचाऱ्यांना कमी करताना शासनाची परवानगी घेतली होती का, याबाबत लेखी विचारणा केली. चौकशीत लिक्विडेटरने कोणतीही शासनपरवानगी न घेता कर्मचारी कमी केल्याचे स्पष्ट झाले.
शासकीय कामगार अधिकारी चौकशीसाठी येणार असल्याचे समजताच, कर्मचाऱ्यांचे तीन वर्षांपासून रखडलेले ८–१०% वेतन बँकेने अचानक जमा केल्याची माहितीही देण्यात आली.
सभासदांची बँक पुन्हा सुरू करण्याची ठाम मागणी
या मेळाव्यात उपस्थित सर्व सदस्यांनी बँक पुन्हा कार्यान्वित करण्यासाठी पुढील मुद्द्यांवर एकमुखी ठराव केला —
रिझर्व्ह बँकेने रद्द केलेला बँकेचा परवाना पुन्हा मंजूर करावा
लिक्विडेटरची नियुक्ती रद्द करून बँकेचे नियंत्रण पुन्हा सभासदांकडे द्यावे
२०५ कर्मचाऱ्यांना पूर्ववत कामावर घेऊन तीन वर्षांचे थकीत वेतन द्यावे
सेवा विकास सहकारी बँक कोणत्याही अन्य संस्थेत विलीन किंवा हस्तांतरित करू नये
हे सर्व ठराव सेवा विकास बँक बचाव कृती समिती आणि सभासदांच्या प्रतिनिधित्वातून आयुक्त सहकार, महाराष्ट्र शासन व लिक्विडेटर यांना सादर करण्याचे निश्चित झाले.
सभासदांचा निर्धार – “ही बँक आम्हीच उभी केली, त्यामुळे आम्हीच वाचवू”
बँकेचे स्थापनेला ५० वर्षे पूर्ण झाली असून ती व्यापाऱ्यांनी उभी केलेली सहकारी बँक असल्याने ही बँक अस्मितेचा विषय असल्याचे सभासदांनी पुन्हा एकदा स्पष्ट केले. बँकेच्या बचावासाठी शहरातील व्यापारी, ग्राहक आणि सभासदांना एकत्र आणण्याची जबाबदारी सर्वांनी स्वेच्छेने स्वीकारली.
मेळाव्यात माजी संचालक अशोक दखनेजा यांनी ठराव मांडला, तर व्ही. टी. जोगदंड यांनी त्यास अनुमोदन दिले. सूत्रसंचालन व आभार प्रदर्शन सिद्धार्थ ओव्हाळ यांनी केले.
या मेळाव्यानंतर सेवा विकास बँक बचाव कृती समितीने बँक वाचवण्यासाठी आंदोलन, मागण्या आणि पुढील कायदेशीर लढाई तीव्र करण्याचे संकेत दिले.
