नागपूर | प्रतिनिधी
विधानपरिषद सदस्य म्हणून आमदार अमित गोरखे यांच्या पहिल्या वर्षातील कार्याचा सविस्तर आणि पारदर्शक लेखाजोखा मांडणाऱ्या “कर्तव्यपथाचे ३६५ दिवस” या वर्षपूर्ती कार्यअहवालाचे प्रकाशन आज नागपूर येथील मुख्यमंत्री दालनात मुख्यमंत्री देवेंद्र फडणवीस यांच्या शुभहस्ते पार पडले. लोकप्रतिनिधी म्हणून केलेल्या कामांचा जनतेसमोर उत्तरदायीपणे हिशोब मांडण्याचा हा प्रयत्न असल्याचे मत यावेळी उपस्थित मान्यवरांनी व्यक्त केले.
“कर्तव्यपथाचे ३६५ दिवस” या कार्यअहवालामध्ये आमदार अमित गोरखे यांनी विधानपरिषद सदस्य म्हणून शपथ घेतल्यानंतर वर्षपूर्तीपर्यंत केलेल्या विविध विधीमंडळीय हस्तक्षेपांचा, चर्चांमधील सक्रीय सहभागाचा आणि प्रश्नोत्तरांच्या माध्यमातून शासनाचे लक्ष वेधलेल्या जनहिताच्या मुद्द्यांचा सविस्तर आढावा देण्यात आला आहे. शिक्षण, युवक, रोजगार, सामाजिक न्याय, सांस्कृतिक प्रश्न तसेच सर्वसामान्य नागरिकांच्या अडचणी या विषयांवर त्यांनी सातत्याने आवाज उठविल्याचे या अहवालातून स्पष्ट होते.
मुख्यमंत्री देवेंद्र फडणवीस यांनी यावेळी बोलताना सांगितले की, “राजकीय आणि सामाजिक क्षेत्रात कार्य करत असताना आपण केलेल्या विकासकामांचा तसेच समाजोपयोगी उपक्रमांचा हिशोब जनतेसमोर मांडणे ही लोकशाहीची गरज आहे. आमदार अमित गोरखे यांचा हा प्रयत्न निश्चितच प्रशंसनीय आहे. विधानपरिषद ही कायदानिर्मितीमध्ये अत्यंत महत्त्वाची भूमिका बजावते आणि त्या सभागृहात श्री. गोरखे यांनी विविध विषयांवर घेतलेला सक्रिय सहभाग उल्लेखनीय आहे.”
मुख्यमंत्री फडणवीस पुढे म्हणाले की, आमदार अमित गोरखे यांचा कार्यकर्ता ते विधानपरिषद सदस्य आणि तालुका सभापती पदापर्यंतचा प्रवास संघर्षातून घडलेला आहे. त्या प्रवासातून निर्माण झालेले संवेदनशील आणि जबाबदार नेतृत्व त्यांच्या कामातून दिसून येते. “कर्तव्यपथाचे ३६५ दिवस” हा अहवाल केवळ आकडेवारी नसून, लोकप्रतिनिधी म्हणून जबाबदारीची जाणीव अधोरेखित करणारा दस्तऐवज आहे, असेही त्यांनी नमूद केले.
या कार्यअहवालामध्ये विधिमंडळातील प्रश्न, लक्षवेधी सूचना, अल्पकालीन चर्चांमधील सहभाग, तसेच सभागृहाबाहेर सामाजिक आणि जनहिताच्या उपक्रमांसाठी केलेल्या पाठपुराव्याचा सुसंगत आढावा मांडण्यात आला आहे. सामान्य नागरिकांशी थेट संवाद साधत त्यांच्या समस्या शासनदरबारी मांडण्याची भूमिका आमदार अमित गोरखे यांनी सातत्याने जपल्याचे या अहवालातून अधोरेखित होते.
कार्यक्रमाच्या निमित्ताने उपस्थित मान्यवरांनी मत व्यक्त केले की, “कर्तव्यपथाचे ३६५ दिवस” हा अहवाल पारदर्शक लोकशाहीचे उत्तम उदाहरण आहे. भविष्यातील अधिक प्रभावी, नियोजनबद्ध आणि जनकेंद्री कामकाजासाठी हा अहवाल दिशादर्शक ठरेल, असा विश्वास यावेळी व्यक्त करण्यात आला.
या प्रसंगी भोसरीचे आमदार महेश लांडगे, चिंचवडचे आमदार शंकर भाऊ जगताप, पिंपरी–चिंचवड भाजप जिल्हाध्यक्ष शत्रुघ्न काटे यांच्यासह पक्षाचे पदाधिकारी आणि मान्यवर उपस्थित होते. लोकप्रतिनिधी आणि जनता यांच्यात विश्वासाचे नाते अधिक दृढ करणारा “कर्तव्यपथाचे ३६५ दिवस” हा कार्यअहवाल राज्याच्या राजकीय व सामाजिक क्षेत्रात चर्चेचा विषय ठरत आहे.
