पिंपरी चिंचवड
पिंपरी-चिंचवड शहराच्या राजकारणात आज मोठी खळबळ उडाली आहे. पिंपरी गाव येथील भाजपचे माजी नगरसेवक संदीप वाघेरे यांनी भाजपला रामराम ठोकत राष्ट्रवादी काँग्रेस पक्षात जाहीर प्रवेश केला आहे. हा पक्षप्रवेश राज्याचे उपमुख्यमंत्री अजित पवार यांच्या उपस्थितीत पार पडला.
या वेळी राष्ट्रवादी काँग्रेसचे निवडणूक प्रमुख नाना काटे यांच्यासह पक्षाचे अनेक पदाधिकारी आणि कार्यकर्ते उपस्थित होते.
भाजपमध्ये संजोग वाघेरे यांना मिळणारे वाढते महत्त्व, स्थानिक नेतृत्वाकडे होत असलेले दुर्लक्ष तसेच विकासकामांबाबत निर्माण झालेले मतभेद यामुळे संदीप वाघेरे नाराज असल्याची चर्चा होती. संजोग वाघेरे यांच्या भाजप प्रवेशानंतर पक्षातील अंतर्गत राजकारण वाढले असून, निर्णय प्रक्रियेत आपले मत डावलले जात असल्याची भावना संदीप वाघेरे यांची होती, अशी माहिती राजकीय वर्तुळातून समोर येत आहे.
या मतभेदांचा परिणाम म्हणून अखेर संदीप वाघेरे यांनी भाजपमधून बाहेर पडत राष्ट्रवादी काँग्रेसमध्ये प्रवेश करण्याचा निर्णय घेतला. त्यांच्या या प्रवेशामुळे पिंपरी-चिंचवडमधील आगामी महापालिका निवडणुकांच्या पार्श्वभूमीवर राजकीय समीकरणे बदलण्याची दाट शक्यता वर्तवली जात आहे.
दरम्यान, संदीप वाघेरे यांच्या प्रवेशामुळे राष्ट्रवादी काँग्रेसची संघटनात्मक ताकद वाढणार असून, भाजपसाठी हा मोठा धक्का मानला जात आहे.
