पिंपरी-चिंचवडमध्ये शिवसेनेला मोठे खिंडार; राजेश आरसूळ दोन हजार कार्यकर्त्यांसह राष्ट्रवादी काँग्रेसमध्ये दाखल
पिंपरी :
पिंपरी-चिंचवड महानगरपालिकेच्या सार्वत्रिक निवडणुकीच्या पार्श्वभूमीवर शहरातील राजकारणात मोठ्या उलथापालथींना वेग आला आहे. गेल्या काही दिवसांपासून विविध पक्षांत हालचाली वाढल्या असताना आता शिवसेनेला मोठा धक्का बसला असून, खासदार श्रीरंग बारणे यांचे निकटवर्तीय आणि शिवसेना पिंपरी-चिंचवड उपशहर प्रमुख राजेश आरसूळ राष्ट्रवादी काँग्रेसमध्ये प्रवेश केल्याने राजकीय समीकरणे बदलण्याची चिन्हे स्पष्ट झाली आहेत.
शिवसेनेत महत्त्वाची जबाबदारी सांभाळणारे राजेश आरसूळ यांनी आपल्या पत्नी सौ. मनीषा राजेश आरसूळ यांच्यासह आणि जवळपास दोन हजार कार्यकर्त्यांसोबत राष्ट्रवादी काँग्रेस पक्षात अधिकृत प्रवेश केला. पुण्यात पार पडलेल्या या पक्षप्रवेश सोहळ्याला राज्याचे उपमुख्यमंत्री अजित पवार, राष्ट्रवादी काँग्रेसचे पिंपरी-चिंचवड शहर निवडणूक प्रमुख नाना काटे, नगरसेवक भाऊसाहेब भोईर यांच्यासह अनेक प्रमुख पदाधिकारी उपस्थित होते.
महानगरपालिकेची निवडणूक तोंडावर असताना घडलेला राजेश आरसूळ राष्ट्रवादी काँग्रेसमध्ये प्रवेश हा केवळ पक्षांतर नसून, शहरातील आगामी राजकीय लढतीच्या दृष्टीने तो अत्यंत निर्णायक मानला जात आहे. गेल्या काही काळात भाजपकडून राष्ट्रवादी काँग्रेसवर सातत्याने दबाव वाढवण्यात येत होता. अनेक नगरसेवकांनी पक्ष बदलल्याने राष्ट्रवादी काँग्रेससमोर आव्हान निर्माण झाले होते. मात्र, या पक्षप्रवेशामुळे अजित पवार यांच्या नेतृत्वाखालील राष्ट्रवादी काँग्रेसने पुन्हा एकदा आक्रमक पवित्रा घेतल्याचे चित्र आहे.
या प्रवेशामुळे विशेषतः वाल्हेकरवाडी, चिंचवडेनगर परिसरातील प्रभाग क्रमांक १७ मधील राजकीय समीकरणे बदलली आहेत. या प्रभागात राष्ट्रवादी काँग्रेसचे पॅनल अधिक मजबूत झाले असून भाजप व शिवसेनेसाठी ही बाब निश्चितच डोकेदुखी ठरण्याची शक्यता आहे. स्थानिक पातळीवर प्रभाव असलेले कार्यकर्ते मोठ्या संख्येने राष्ट्रवादी काँग्रेसमध्ये दाखल झाल्याने प्रचारयंत्रणेला बळ मिळाले आहे.
पक्षप्रवेशावेळी बोलताना उपमुख्यमंत्री अजित पवार यांनी सौ. मनीषा राजेश आरसूळ यांचे विशेष कौतुक केले. “युवक-युवतींना संधी देऊन त्यांच्यातील नेतृत्वगुण विकसित करणे हे राष्ट्रवादी काँग्रेसचे धोरण आहे. सौ. मनीषा आरसूळ यांच्यासारख्या अभ्यासू आणि ऊर्जावान उमेदवारामुळे पिंपरी-चिंचवड शहराच्या विकासाला निश्चितच गती मिळेल,” असे मत त्यांनी व्यक्त केले.
यावेळी सौ. मनीषा राजेश आरसूळ यांनी माध्यमांशी संवाद साधताना सांगितले की, “उपमुख्यमंत्री अजित पवार यांच्यासारख्या अनुभवी आणि विकासाभिमुख नेतृत्वासोबत काम करण्याची संधी मिळणे हा माझ्यासाठी अभिमानाचा क्षण आहे. शहराच्या सर्वांगीण विकासासाठी मी प्रामाणिकपणे काम करेन.” तसेच नगरसेवक भाऊसाहेब भोईर आणि निवडणूक प्रमुख नाना काटे यांनी दाखवलेल्या विश्वासाबद्दल त्यांनी आभार मानले.
एकूणच, राजेश आरसूळ राष्ट्रवादी काँग्रेसमध्ये प्रवेश या घटनेमुळे पिंपरी-चिंचवडच्या निवडणूक रणधुमाळीत नवे वळण मिळाले असून, येत्या काळात आणखी राजकीय हालचाली वाढण्याची शक्यता नाकारता येत नाही.
