पिंपरी–चिंचवड | प्रतिनिधी
पिंपरी–चिंचवड महानगरपालिकेच्या आगामी सार्वत्रिक निवडणुकांच्या पार्श्वभूमीवर भारतीय जनता पार्टीने पिंपरी शहरात एक ऐतिहासिक यश संपादन केले आहे. आमदार अमित गोरखे आणि उद्योजक उमेशभाऊ चांदगुडे यांच्या नेतृत्वाखाली प्रभाग क्रमांक १०-ब मधून सौ. सुप्रिया चांदगुडे यांची बिनविरोध निवड झाली असून, त्या पिंपरीतील भाजपाच्या पहिल्या महिला नगरसेवक ठरल्या आहेत.
भाजपाने ‘शतप्रतिशत भाजप’ आणि ‘अबकी बार १०० पार’ या ठाम संकल्पनेसह महानगरपालिका निवडणुकीसाठी जोरदार तयारी सुरू केली असून, सुप्रिया चांदगुडे यांच्या बिनविरोध निवडीमुळे पक्षाची संघटनात्मक ताकद, कार्यकर्त्यांचा उत्साह आणि नागरिकांचा भाजपावर असलेला विश्वास अधिक बळकट झाला आहे.
या बिनविरोध निवडीनंतर आमदार अमित गोरखे यांच्या कर्तव्यपथ येथील जनसंपर्क कार्यालयासमोर आनंदोत्सवाचे वातावरण पाहायला मिळाले. भाजप पदाधिकारी, कार्यकर्ते आणि प्रभाग क्रमांक १० मधील उमेदवारांच्या वतीने फटाके फोडून, पुष्पगुच्छ देत आणि जोरदार घोषणाबाजी करून सुप्रिया चांदगुडे यांचे जल्लोषात स्वागत करण्यात आले.
दरम्यान, भाजपासाठी आणखी एक महत्त्वाचा टप्पा ठरला असून प्रभाग क्रमांक ६ मधून रवी लांडगे यांची सलग दुसऱ्यांदा बिनविरोध नगरसेवक म्हणून निवड झाली आहे. सलग दोन प्रभागांत बिनविरोध यश मिळाल्याने पिंपरी–चिंचवडमध्ये भाजपाची राजकीय ताकद अधिक ठळकपणे समोर आली आहे.
आमदार अमित गोरखे यांच्या नेतृत्वाखाली पिंपरी–चिंचवडमध्ये भाजपाची वाटचाल वेगाने सुरू असून, आगामी महानगरपालिका निवडणुकांमध्ये भाजप ऐतिहासिक विजय मिळवेल, असा विश्वास पक्षाचे पदाधिकारी आणि कार्यकर्त्यांनी व्यक्त केला आहे.
