⚠️ निगडी जलशुद्धीकरण केंद्रावरील कामांमुळे पिंपरी-चिंचवडमध्ये एक दिवस पाणीबंद
पिंपरी, २० फेब्रुवारी २०२६: शहरातील पाणीपुरवठा व्यवस्थेची नियमित देखभाल आणि दुरुस्तीची कामे हाती घेतल्याने सोमवार, २३ फेब्रुवारी २०२६ रोजी संध्याकाळचा पाणीपुरवठा पूर्णतः बंद राहणार आहे. से.क्र. २३ येथील स्थापत्य व विद्युत विषयक कामांसह क्षेत्रीय स्तरावरील वितरण यंत्रणेतील आवश्यक दुरुस्तीमुळे हा निर्णय घेण्यात आला आहे.
महानगरपालिकेच्या पाणीपुरवठा विभागामार्फत निगडी जलशुद्धीकरण केंद्रावरील देखभाल दुरुस्तीची कामे नियोजित करण्यात आली आहेत. शहरातील पाणीपुरवठा यंत्रणा सुरळीत राहावी आणि भविष्यात कोणताही तांत्रिक अडथळा निर्माण होऊ नये, यासाठी ही कामे आवश्यक असल्याचे प्रशासनाने स्पष्ट केले आहे.
या पार्श्वभूमीवर सोमवार, २३ फेब्रुवारी रोजी संध्याकाळचा पाणीपुरवठा शहरातील सर्व भागात पूर्णतः बंद राहणार आहे. तसेच, मंगळवार, २४ फेब्रुवारी २०२६ रोजी सकाळचा पाणीपुरवठा अनियमित आणि कमी दाबाने होण्याची शक्यता वर्तविण्यात आली आहे.
नागरिकांनी पाणीपुरवठा बंद कालावधीत आवश्यक त्या प्रमाणात पाण्याचा साठा करून काटकसरीने वापर करावा, असे आवाहन महानगरपालिकेकडून करण्यात आले आहे. देखभाल दुरुस्तीची कामे वेळेत पूर्ण करून पाणीपुरवठा पूर्ववत करण्यासाठी प्रशासन प्रयत्नशील असल्याचेही सांगण्यात आले.
पाणीपुरवठ्यातील या तात्पुरत्या गैरसोयीबाबत नागरिकांनी सहकार्य करावे, असे आवाहन अतिरिक्त आयुक्त विक्रांत बगाडे यांनी केले आहे.
