महापालिकेतर्फे स्वच्छता मोहीम, जनजागृती आणि पाणी बचतीची सामूहिक प्रतिज्ञा
पिंपरी, दि. २२ मार्च २०२६:जागतिक जल दिनानिमित्त पिंपरी चिंचवड महानगरपालिकेच्या पर्यावरण अभियांत्रिकी विभाग व पाणीपुरवठा विभाग यांच्या संयुक्त विद्यमाने तसेच डॉ. डी. वाय. पाटील इन्स्टिट्यूट, पिंपरी यांच्या सहकार्याने रावेत बंधारा येथील पवना नदी काठावर विविध उपक्रमांचे आयोजन करण्यात आले.
कार्यक्रमाची सुरुवात जागतिक जल दिनाचे महत्त्व, पाण्याचे संवर्धन, जलस्रोतांचे वाढते प्रदूषण तसेच नदी, नाले आणि पाणवठ्यांच्या स्वच्छतेची गरज याबाबत विद्यार्थ्यांना मार्गदर्शन करून करण्यात आली. त्यानंतर नदीकाठ व परिसरात स्वच्छता मोहीम राबवून प्रत्यक्ष कृतीद्वारे जनजागृती करण्यात आली.
या उपक्रमादरम्यान उपस्थित सर्वांनी पाण्याची बचत व संवर्धन करण्याची प्रतिज्ञा घेतली. पाणीपुरवठा विभागामार्फत पाणी बचतीचे महत्त्व आणि सध्याच्या काळातील गरज याविषयी सविस्तर माहिती देण्यात आली. स्वच्छता मोहिमेनंतर महानगरपालिकेचे कर्मचारी व डी. वाय. पाटील कॉलेजचे विद्यार्थी यांनी पवना नदी काठावर जनजागृतीपर रील्स तयार करून या उपक्रमात उत्साहाने सहभाग नोंदविला.
या कार्यक्रमास पर्यावरण अभियांत्रिकी विभागाचे कार्यकारी अभियंता योगेश आल्हाट, सोहन निकम, उपअभियंता पंकज फेंडे, प्रीती गाडे तसेच पाणीपुरवठा विभागाचे कार्यकारी अभियंता महेश बरीदे, उपअभियंता प्रवीण धुमाळ व दोन्ही विभागांचे कनिष्ठ अभियंते उपस्थित होते. तसेच डॉ. डी. वाय. पाटील कॉलेजच्या मुख्य समन्वयक डॉ. गौरी पाटील यांनी कार्यक्रमाचे नियोजन व आयोजन केले.
“आजच्या वाढत्या शहरीकरण आणि हवामान बदलाच्या पार्श्वभूमीवर पाण्याचे संवर्धन ही केवळ गरज नसून प्रत्येक नागरिकाची जबाबदारी बनली आहे. नदी, नाले आणि जलस्रोत स्वच्छ ठेवणे, पाण्याचा काटकसरीने वापर करणे आणि पुढील पिढ्यांसाठी पाणी जतन करणे आवश्यक आहे. अशा जनजागृती उपक्रमांमुळे समाजात सकारात्मक बदल घडून येतो आणि पर्यावरण संरक्षणाला बळकटी मिळते.”
– संजय कुलकर्णी, मुख्य अभियंता, पिंपरी चिंचवड महापालिका.
