आमदार महेश लांडगे यांचा ‘विकासाभिमुख हिंदुत्व’ जागृती अभियानाचा प्रारंभ

पिंपरी-चिंचवड | प्रतिनिधी

देव–देश–धर्म आणि शाश्वत विकास यांचा समतोल साधणाऱ्या ‘विकासाभिमुख हिंदुत्व जागृती अभियान’ या अभिनव उपक्रमाला पिंपरी-चिंचवड शहरात प्रारंभ होत आहे. भारतीय जनता पार्टीचे आमदार महेश लांडगे यांच्या संकल्पनेतून साकार होणारे हे अभियान भोसरी विधानसभा मतदारसंघात दि. 16 ते 25 डिसेंबरदरम्यान राबवले जाणार आहे. सलग दहा दिवस चालणाऱ्या या उपक्रमात भोसरीतील 12 प्रभागांमध्ये घराघरांत जाऊन जनजागृती केली जाणार आहे.

या अभियानाचे प्रमुख आकर्षण म्हणजे ‘स्टॅच्यू ऑफ हिंदुभूषण’ गौरव रथ. धर्मवीर छत्रपती संभाजी महाराज यांच्या शौर्य, बलिदान आणि हिंदवी स्वराज्याच्या विचारांचे स्मरण करून देणारा हा गौरव रथ विविध प्रभागांतून प्रवास करणार आहे. हिंदुत्व, राष्ट्रभक्ती आणि विकास यांचा संदेश देणारा हा रथ नागरिकांमध्ये विशेष आकर्षण ठरत आहे. देशात प्रथमच विकास आणि हिंदुत्व यांची सांगड घालणारे विकासाभिमुख हिंदुत्व जागृती अभियान म्हणून या उपक्रमाकडे पाहिले जात आहे.

मोशी येथील बोऱ्हाडेवाडी परिसरात उभारण्यात येत असलेले जगातील सर्वात उंच धर्मवीर छत्रपती संभाजी महाराज यांचे शिल्प — ‘स्टॅच्यू ऑफ हिंदुभूषण’ — पिंपरी-चिंचवडची नवी ओळख ठरत आहे. हे स्मारक केवळ ऐतिहासिक वारसा नसून शिव–शंभू विचारांचे प्रेरणास्थान आणि भावी पिढ्यांसाठी शक्तीस्थळ ठरणार आहे.

या अभियानामागील वैचारिक भूमिका स्पष्ट करताना, छत्रपती शिवाजी महाराज, छत्रपती संभाजी महाराज आणि स्वातंत्र्यवीर सावरकर यांच्या सर्वसमावेशक हिंदुत्वाच्या विचारांची आजच्या काळात अत्यंत आवश्यकता असल्याचे अधोरेखित करण्यात आले. श्रद्धा, संस्कृती आणि आधुनिक विकास यांचा समन्वय साधल्यासच विकसित राष्ट्राची संकल्पना प्रत्यक्षात साकार होऊ शकते, असा विश्वास व्यक्त करण्यात येत आहे.

संघटनात्मक बळावर थेट जनसंवाद

आगामी महापालिका निवडणुकीच्या पार्श्वभूमीवर पन्ना प्रमुखांपासून प्रभाग अध्यक्षांपर्यंतच्या संघटनात्मक रचनेच्या माध्यमातून नागरिकांशी थेट संवाद साधण्यात येणार आहे. प्रत्येक गावातील ग्रामदैवताचे आशीर्वाद घेऊन अभियानाची सुरुवात होईल. त्यानंतर पालक–विद्यार्थी संवाद, शाळांमधील सुविधांची पाहणी, तज्ज्ञ डॉक्टर, सीए आणि उच्चशिक्षित नागरिकांशी ‘चाय पे चर्चा’, महिला बचतगट संवाद, दुपारी गौरव रथ यात्रा, रॅली, महाआरती आणि सांगता सभा असे विविध उपक्रम राबवले जाणार आहेत.

विकासात्मक हिंदुत्वाची व्यापक संकल्पना

विकासाभिमुख हिंदुत्व जागृती अभियान केवळ धार्मिक ओळख मर्यादित न ठेवता पर्यावरण, शिक्षण, क्रीडा, जैवविविधता, ग्रामसंस्कृती आणि आधुनिक पायाभूत सुविधा यांचा समन्वय साधते. इंद्रायणी नदी सुधार प्रकल्प, वेस्ट टू एनर्जी उपक्रम, गावठाण संवर्धन, आंतरराष्ट्रीय दर्जाची क्रीडा संकुले, बायोडायव्हर्सिटी पार्क, शिक्षणसंस्था, संविधान भवन, गोसंवर्धन आणि नियोजित नागरी विकास हे या विचारांचे प्रत्यक्ष उदाहरण असल्याचे नमूद करण्यात आले.

आमदार महेश लांडगे यांची प्रतिक्रिया

“हिंदुत्व ही केवळ ओळख नसून ती संस्कृती, मूल्ये आणि राष्ट्रनिर्मितीची शक्ती आहे. विकासाशिवाय हिंदुत्व अपूर्ण आहे आणि हिंदुत्वाशिवाय विकास दिशाहीन ठरतो. पिंपरी-चिंचवडला विकास आणि संस्कृती यांचा समतोल साधणारे आदर्श शहर बनवण्यासाठी विकासाभिमुख हिंदुत्व जागृती अभियान जनआंदोलन म्हणून राबवले जाईल,” असे आवाहन आमदार महेश लांडगे यांनी केले.