पिंपरी, दि. ९ मार्च २०२६ : पिंपरी-चिंचवड शहरातील वाढत्या वायू प्रदूषणावर नियंत्रण ठेवण्यासाठी पिंपरी चिंचवड महानगरपालिकेच्या पर्यावरण विभागामार्फत विविध उपाययोजना राबविण्यात येत आहेत. शहरातील आर.एम.सी. (Ready Mix Concrete) प्लांट, बांधकाम स्थळे तसेच बांधकाम साहित्य साठवणूक ठिकाणी धूळ व वायू प्रदूषण रोखण्यासाठी आवश्यक प्रतिबंधात्मक उपाययोजना करणे बंधनकारक करण्यात आले आहे.
महाराष्ट्र प्रदूषण नियंत्रण मंडळाने १७ ऑक्टोबर २०२४ रोजी जारी केलेल्या परिपत्रकानुसार आर.एम.सी. प्लांट तसेच बांधकाम स्थळांवर धूळ नियंत्रणासाठी ठरवून दिलेल्या मार्गदर्शक सूचनांचे पालन करणे आवश्यक आहे. मात्र काही ठिकाणी या सूचनांचे पालन होत नसल्याचे महानगरपालिकेच्या निदर्शनास आले आहे.
शहरातील वायू गुणवत्ता निर्देशांक (AQI) मोजणी केंद्रांच्या नोंदीनुसार पिंपरी-चिंचवडमधील हवेची गुणवत्ता सध्या ‘मध्यम’ (AQI १०० ते १५०) या श्रेणीत असल्याचे दिसून येत आहे. त्यामुळे शहरातील आर.एम.सी. प्लांट धारक, बांधकाम व्यावसायिक तसेच बांधकाम साहित्य पुरवठादार यांनी धूळ आणि वायू प्रदूषण नियंत्रणासाठी आवश्यक उपाययोजना तात्काळ राबवाव्यात, असे आवाहन महापालिकेने केले आहे.
महानगरपालिकेच्या क्षेत्रीय कार्यालयामार्फत संबंधित आस्थापनांची नियमित तपासणी करण्यात येणार असून नियमांचे उल्लंघन करणाऱ्या आस्थापनांवर कठोर कारवाई करण्यात येणार आहे.
आवश्यक उपाययोजना पूर्ण होईपर्यंत संबंधित आस्थापना बंद ठेवण्याचा निर्णयही घेतला जाऊ शकतो. तसेच गरज भासल्यास संबंधित आस्थापना सील करण्याची कारवाईही करण्यात येईल, असा इशारा देण्यात आला आहे.
या संदर्भात पर्यावरण विभागाचे मुख्य अभियंता संजय कुलकर्णी यांनी सर्व संबंधितांनी नियमांचे पालन करून महानगरपालिकेला सहकार्य करण्याचे आवाहन केले आहे.
