पवनाथडी जत्रेसाठी उद्या रविवार, दिनांक २२ फेब्रुवारी २०२६ रोजी लकी ड्रॉ पद्धतीने होणार गाळे (स्टॉल) वाटप

लकी ड्रॉ पद्धतीने उद्या रविवार, दिनांक २२ फेब्रुवारी २०२६ रोजी सकाळी ११ वाजता पिंपरी मुख्य प्रशासकीय इमारतीमधील मा. मधुकरराव पवळे सभागृह येथे पवनाथडी जत्रेचे गाळे वाटप होणार

पिंपरी चिंचवड,प्रतिनिधी|

पिंपरी चिंचवड महानगरपालिकेमार्फत महिला बचत गटांना बाजारपेठ उपलब्ध करून देणे, महिलांमध्ये विपणन व विक्री कौशल्ये विकसित करणे तसेच महाराष्ट्राच्या सांस्कृतिक परंपरा आणि शहरी संस्कृतीचे जतन करणे या उद्देशाने दरवर्षी पवनाथडी जत्रा आयोजित करण्यात येते .यावर्षी पवनाथडी जत्रा दिनांक २५ फेब्रुवारी ते १ मार्च २०२६ या कालावधीत सांगवी पी.डब्ल्यू.डी. मैदान येथे आयोजित करण्यात आली आहे.पवनाथडी जत्रा ही महिला बचत गटांसाठी एक महत्त्वपूर्ण व्यासपीठ ठरली आहे. महिला उद्योजकांनी तयार केलेल्या विविध उत्पादनांना थेट ग्राहकांपर्यंत पोहोचण्याची संधी या जत्रेमुळे उपलब्ध होते.

पवनाथडी जत्रेत सहभागासाठी अर्ज वाटप व स्वीकृती दिनांक १० फेब्रुवारी २०२६ ते १८ फेब्रुवारी २०२६ या कालावधीत करण्यात आली. महिला बचत गटांकडून खालीलप्रमाणे अर्ज प्राप्त झाले आहेत. जनरल प्रवर्ग – ५११, व्हेज प्रवर्ग – ३७३, नॉनव्हेज प्रवर्ग – २१०. तसेच दिव्यांग राखीव प्रवर्ग यामध्ये ५ , तृतीयपंथी प्रवर्ग – ३ असे अर्ज प्राप्त झाले आहेत. लकी ड्रॉ पद्धतीने गाळे वाटप रविवार, दिनांक २२ फेब्रुवारी २०२६ रोजी सकाळी ११.०० वाजता मा. मधुकरराव पवळे सभागृह, तिसरा मजला, मुख्य कार्यालय, पिंपरी चिंचवड महानगरपालिका येथे करण्यात येणार आहे. सर्व अर्जदार महिला बचत गटांच्या प्रतिनिधींनी वेळेत उपस्थित राहावे.या सोडतीसाठी उपमहापौर शर्मिला बाबर, डॉ. श्रध्दा रवी लांडगे, समाज विकास विभागाच्या उप आयुक्त ममता शिंदे इतर पदाधिकारी,नगरसदस्या आणि बचत गटातील महिला प्रतिनिधी उपस्थित राहणार आहेत.

जत्रेची वैशिष्ट्ये

महिला बचत गटांनी उत्पादित केलेल्या वस्तूंना थेट ग्राहकांपर्यंत पोहोचण्याची संधी….
पारंपरिक खाद्यपदार्थ, हस्तकला, घरगुती उत्पादने, वस्त्रनिर्मिती, सजावटीच्या वस्तूंचे प्रदर्शन व विक्री
सांस्कृतिक कार्यक्रम, लोककला सादरीकरणे आणि मनोरंजन उपक्रम
स्वच्छ, सुरक्षित आणि कुटुंबियांसाठी अनुकूल वातावरण

जत्रेतील आकर्षणे

* पारंपरिक महाराष्ट्रीयन खाद्यपदार्थांचे स्टॉल
* घरगुती मसाले, पापड, लोणची, बेकरी पदार्थ
* हस्तकला वस्तू, दागिने, वस्त्रनिर्मिती, सजावटी साहित्य
* महिलांनी तयार केलेली पर्यावरणपूरक उत्पादने
* लघुउद्योग व स्वयंसहाय्यता गटांची माहिती व मार्गदर्शन केंद्रे

सांस्कृतिक कार्यक्रम

* दररोज सायंकाळी विविध सांस्कृतिक कार्यक्रमांचे आयोजन करण्यात येणार आहे. लोकनृत्य, लोकगीते, सादरीकरणे तसेच स्थानिक कलाकारांचे विशेष कार्यक्रम हे जत्रेचे आकर्षण ठरणार आहेत. यामुळे जत्रेला कौटुंबिक स्वरूप प्राप्त होते.

सुविधा
* प्रशस्त व सुयोग्य स्टॉल व्यवस्था
* स्वच्छता व सुरक्षिततेची विशेष काळजी
* अग्निसुरक्षा व प्राथमिक उपचार सुविधा
* पिण्याच्या पाण्याची व्यवस्था
* पार्किंग सुविधा

आर्थिक व सामाजिक परिणाम

पवनाथडी जत्रेमुळे अनेक महिला बचत गटांना वर्षभरासाठी मोठ्या प्रमाणात ऑर्डर मिळतात. महिलांच्या उत्पन्नात वाढ होऊन त्यांचे आर्थिक सक्षमीकरण होते. तसेच समाजात महिला उद्योजकांविषयी सकारात्मक दृष्टीकोन निर्माण होतो.पवनाथडी जत्रा ही केवळ खरेदी-विक्रीची संधी नसून महिला सक्षमीकरण, संस्कृती संवर्धन आणि सामाजिक एकात्मतेचा उत्सव आहे.

पवनाथडी जत्रेला कुटुंबासह भेट देऊन स्थानिक महिला उद्योजकांना प्रोत्साहन द्यावे आणि ‘व्होकल फॉर लोकल’ संकल्पनेला बळ द्यावे, असे आवाहन समाज विकास विभागाच्या उप आयुक्त ममता शिंदे यांच्याद्वारे करण्यात आले आहे.

ही जत्रा केवळ खरेदी-विक्रीचा उपक्रम नसून महिला सक्षमीकरणाचा एक महत्त्वपूर्ण उत्सव आहे.