८ मजली इमारतीला लागली आग, काही सेकंदात धावले ‘देवदूत’! पिंपरीतल्या मॉक ड्रील चा थरार पाहून थक्क व्हाल!

नागरिकांना देण्यात आले अग्निसुरक्षेचे धडे!

राष्ट्रीय अग्निशमन सेवा सप्ताहानिमित्त पिंपरी चिंचवड महापालिकेच्या अग्निशमन विभागाचे प्रात्यक्षिक व जनजागृती उपक्रम

पिंपरीत अग्निसुरक्षेच्या मॉक ड्रील चा थरार अनुभवला!

पिंपरी, १७ एप्रिल २०२५ :
पिंपरी चिंचवड शहरातील नागरिकांसाठी एक रोमांचकारी अनुभव ठरलेली अग्निसुरक्षा मॉक ड्रील नुकतीच निगडी येथील शरदनगर व दुर्गानगर सहकारी गृहनिर्माण संस्थांमध्ये पार पडली. इमारतीच्या आठव्या मजल्यावर अचानक लागलेली आग, स्थानिकांचा अपुऱ्या साधनांनी केलेला प्रतिकार, आणि काही मिनिटांत घटनास्थळी धडकलेले अग्निशमन दल… हे सगळं अगदी चित्रपटात शोभेल अशा थरारक शैलीत अनुभवायला मिळालं.

महानगरपालिकेच्या अग्निशमन विभागाकडून राष्ट्रीय अग्निशमन सेवा सप्ताहाचे औचित्य साधून १५ एप्रिल रोजी सकाळी १०.३० ते १२.३० दरम्यान या मॉक ड्रिलचे आयोजन करण्यात आले. या काळात प्रत्यक्षात इमारतीला आग लागल्याची कल्पना करून, संपूर्ण बचावकार्य अगदी प्रत्यक्ष स्वरूपात सादर करण्यात आले.

हे हि वाचावे

महाराष्ट्रात उष्णतेची लाट तीव्र : पुढील ७२ तास अधिक तापदायक; आरोग्यास धोका दुपारी घराबाहेर जाणं टाळा”

अग्निशमन दलाची तत्परता आणि सुसज्जता

या प्रात्यक्षिकात २ वॉटर टेंडर, २ शीघ्र प्रतिसाद वाहने (देवदूत), एक ब्रांटो हायड्रोलिक प्लॅटफॉर्म (स्काय लिफ्ट) आणि ३० पेक्षा अधिक अग्निशमन जवानांचा सहभाग होता. अडकलेल्या नागरिकांचा उंच शिडीच्या साहाय्याने यशस्वी बचाव करण्यात आला.
हे सगळं बचावकार्य अग्निशमन अधिकारी बाळासाहेब वैद्य यांच्या नेतृत्वाखाली पार पडले. या वेळी उपस्थित नागरिकांना आगीच्या वेळी घ्यावयाची खबरदारी, योग्य उपकरणांचा वापर आणि आपत्कालीन परिस्थितीतील वर्तन यांची माहिती देण्यात आली.

राष्ट्रीय अग्निशमन सेवा सप्ताह – इतिहास आणि उद्दिष्ट

१४ एप्रिल १९४४ रोजी मुंबई डॉकमध्ये झालेल्या प्रचंड स्फोटात अनेक शूर जवानांनी प्राणांची आहुती दिली. त्यांच्या बलिदानाची आठवण ठेवत दरवर्षी १४ एप्रिल ते २० एप्रिल दरम्यान ‘राष्ट्रीय अग्निशमन सेवा सप्ताह’ साजरा केला जातो.

या सप्ताहात महापालिकेकडून शाळा, महाविद्यालये, मॉल्स, शासकीय कार्यालये व औद्योगिक वसाहतींमध्ये जनजागृती मोहिमा, प्रशिक्षण सत्रे व प्रात्यक्षिकांचे आयोजन केले जाते.

इंडिया फायर अँड सेफ्टी मॅनेजमेंट गाईडलाईन्स Click here to know more

प्रशासनाचे विचार

> "१४ एप्रिल १९४४ रोजी मुंबईच्या डॉकमध्ये झालेल्या स्फोटात अनेक जवान शहीद झाले. त्यांच्या स्मृतीप्रित्यर्थ हा सप्ताह पाळला जातो. नागरिकांनी अशा उपक्रमांत सहभागी व्हावे,"
– शेखर सिंह, आयुक्त तथा प्रशासक, पिंपरी चिंचवड महापालिका

> "महानगरपालिका वेळोवेळी अग्निशमन विभाग सुसज्ज करत आहे. आधुनिक साधनसामग्री आणि प्रशिक्षित जवानांच्या माध्यमातून सेवा तत्पर आहे,"
– प्रदीप जांभळे पाटील, अतिरिक्त आयुक्त

> "शहरात विविध सार्वजनिक ठिकाणी जनजागृती उपक्रम राबवले जात आहेत. नागरिकांचा प्रतिसाद उत्स्फूर्त आहे,"
– मनोज लोणकर, उप आयुक्त, अग्निशमन विभाग