पिंपरी, दि. ३ जानेवारी २०२६ (प्रतिनिधी):
पिंपरी-चिंचवड महानगरपालिकेच्या आगामी सार्वत्रिक निवडणुकांच्या पार्श्वभूमीवर राष्ट्रवादी काँग्रेस पार्टीकडून सामाजिक जाणिवा जपत क्रांतीज्योती सावित्रीबाई फुले यांची जयंती मोठ्या उत्साहात साजरी करण्यात आली. राष्ट्रवादी काँग्रेस पार्टी पिंपरी-चिंचवड शहर (जिल्हा) यांच्या वतीने खराळवाडी येथील पक्ष कार्यालयात आयोजित कार्यक्रमात सावित्रीबाई फुले यांच्या प्रतिमेचे विधिवत पूजन व पुष्पहार अर्पण करून अभिवादन करण्यात आले.
या कार्यक्रमास राष्ट्रवादी काँग्रेस शहराध्यक्ष योगेश मंगलसेन बहल यांची प्रमुख उपस्थिती होती. यावेळी त्यांनी सावित्रीबाई फुले यांच्या कार्याचा गौरव करताना सांगितले की, “महिलांच्या शिक्षणासाठी, सामाजिक समतेसाठी आणि अन्यायाविरुद्ध उभ्या राहणाऱ्या सावित्रीबाई फुले या केवळ एका समाजाच्या नव्हे, तर संपूर्ण भारताच्या प्रेरणास्थान आहेत. त्यांचे विचार आजच्या राजकारणाला दिशा देणारे आहेत.”
कार्यक्रमादरम्यान उपस्थित नेत्यांनी सावित्रीबाई फुले यांच्या शिक्षणक्रांती, स्त्री-पुरुष समानता आणि शोषितांच्या हक्कांसाठी दिलेल्या लढ्याचा आढावा घेतला. आगामी निवडणुकांच्या पार्श्वभूमीवर राष्ट्रवादी काँग्रेस पार्टी सामाजिक न्याय, समावेशक विकास आणि सर्वसामान्य नागरिकांच्या प्रश्नांवर ठामपणे उभी असल्याचा संदेश या कार्यक्रमातून देण्यात आला.
या वेळी शहर कार्याध्यक्ष फजल शेख, ओबीसी सेल अध्यक्ष प्रशांत महाजन, माजी नगरसेवक ॲड. गोरक्ष लोखंडे, बन्सी पारडे, पदवीधर अध्यक्ष प्रदीप औटे, वाहतूक सेल अध्यक्ष विनोद वरखडे, उपाध्यक्ष अकबर मुल्ला, संपत पाचुंदकर, अर्बन सेल अध्यक्ष प्रदीप गायकवाड, सुरविंदरसिंग बाला, रामप्रभू नखाते, महेश शिरुडे, धनाजी तांबे, सुनिल आडागळे यांच्यासह अनेक पदाधिकारी व कार्यकर्ते मोठ्या संख्येने उपस्थित होते.
कार्यकर्त्यांनी सावित्रीबाई फुले यांच्या विचारांचा वारसा पुढे नेण्याचा संकल्प केला. शिक्षण, महिला सक्षमीकरण, युवकांसाठी संधी आणि सामाजिक समता या मुद्द्यांवर राष्ट्रवादी काँग्रेस पार्टी आगामी काळात अधिक प्रभावी काम करणार असल्याचे यावेळी सांगण्यात आले.
पिंपरी-चिंचवड शहरात राजकीय वातावरण तापत असताना, अशा सामाजिक व विचारप्रधान कार्यक्रमांमुळे पक्षाची सकारात्मक प्रतिमा जनतेपर्यंत पोहोचत असून, मतदारांमध्ये विश्वास निर्माण होत असल्याचे चित्र दिसत आहे. सावित्रीबाई फुले जयंतीच्या निमित्ताने राष्ट्रवादी काँग्रेसने दिलेला सामाजिक सलोख्याचा संदेश निवडणूक काळात महत्त्वाचा मानला जात आहे.
